வள்ளுவம் படிப்போம் வாழ்வும் சிறக்கும் !



















மகாதேவ ஐயர் ஜெயராமசர்மா
மேனாள் தமிழ் மொழிக்கல்வி இயக்குநர் 
மெல்பேண்    ….. அவுஸ்திரேலியா 




வாழ்வியல் பகரும் வள்ளுவர் குறளோ
வாமன வடிவம் தாங்கியே இருக்கு
வாமன வடிவம் மனமெலாம் நிறைய
வள்ளுவம் உலகில் மலர்ந்துமே இருக்கு

தெள்ளு தமிழில் தெளிவாய் சொன்னார்
உள்ளம் சிறக்க ஒவ்வொன்றாய் சொன்னார்
சமயம் கடந்த தத்துவம் சொன்னார்
தமிழர் வள்ளுவர் என்பதே பெருமை

குறளைப் படித்தால் குறைகள் அகலும்
குறளைப் படித்தால் குணங்கள் சிறக்கும்
குறளை படித்தால் குழப்பம் அகலும்
குறளைப் படிப்போம் வாழ்வு சிறக்கும்

எண்ணிய எண்ணம் திண்ணமாய் இருக்கவேண்டும் !



   










மகாதேவ ஐயர் ஜெயராமசர்மா
மேனாள் தமிழ் மொழிக்கல்வி இயக்குநர் 
மெல்பேண்    ….. அவுஸ்திரேலியா 




நிதி இருந்தால் நீதி இருக்கவேண்டும்
மனம் இருந்தால் மானம் இருக்கவேண்டும்
தனம் இருந்தால் தானம் இருக்க வேண்டும்
குணம் இருந்தால் கொடுத்து உதவவேண்டும் 

இடர் மிகுந்தால் எழுந்து எதிர்த்திடவேண்டும்
துயர் மிகுந்தால் துடைத்து எறிந்திடவேண்டும்
களை நிறைந்தால் பிடுங்கி எறிந்திடவேண்டும்
கருத்தில் நல்லதை பதித்திடவே வேண்டும்

எண்ணித் துணிந்து எதையும் தொடங்கிடவேண்டும் 
எண்ணிய எண்ணம் திண்ணமாய் இருக்கவேண்டும்
பண்ணிடும் காரியம் பலருக்கும் உதவவேண்டும் 
பாருளோர் யாவரும் பார்த்துமே வியக்கவேண்டும்

புதிராய் என்னை வியப்பில் ஆழ்த்தியது! - சங்கர சுப்பிரமணியன்.

 

புலிக்குட்டி ஒன்று அடிபட்டுக் கிடந்தது    


வளர்த்தோரில் பலர் விட்டுச் சென்றனர்  

அவ்வேளையில் நான் சென்றிருந்தேன்  

பண்பால் நான் பாதுகாத்து வளர்த்தேன்


குணமடைந்ததும் குணமாகவே இருந்தது
அங்கும் இங்கும் நன்றாக ஓடித் திரிந்தது
பிறரை துன்புறுத்தாது பழக்கியிருந்தேன்
நன்றாக வளர்ந்ததும் இயல்பை காட்டியது

விட்டுச் சென்றவர்கள் ஆட்டி வைத்தார்கள்
இடையில் வந்து உரிமை கொண்டாடினர்
புதிதாய் வந்தும் சொந்தம் கொண்டாடினர்
புலிபசித்தாலும் புல்லைத் தின்னாதல்லவா

அதனால் அதற்கு நன்றி தெரியாது போனது
பாதுகாத்தவனை சிலர் சீண்டிப் பார்த்தாலும்
சிறிதும் சிந்தையின்றி சிவனே என்றிருந்தது
இரக்கத்தால் பாதுகாத்தது என் பண்பாகும்

கவிதை..."காதல் சொல்ல … இல்லை!"... மெல்போர்ன் அறவேந்தன்


 












இன்றைய மனிதனிடம் நேர்மை குறைவதற்கான முக்கியக் காரணம் – பணத்தின் மீதான பேராசை

 இன்றைய மனிதனிடம் நேர்மையும் ஒழுக்கமும் குறைந்து வருவதற்கு முக்கியக் காரணம் பணத்தின் மீதான அளவற்ற ஆசையே ஆகும். செல்வம் பெருகும்போது ஆணவமும் அதிகரிக்கிறது. ஆணவம் அதிகரிக்கும்போது தீய குணங்களும் பெருகுகின்றன. செல்வம் இழக்கப்படும்போது ஆணவம் மறைகிறது. ஆணவம் குறையும்போது தீய குணங்களும் படிப்படியாக மறைகின்றன.

ஒருவர் விஞ்ஞானியாக இருந்தாலும், தொழிலதிபராக இருந்தாலும் அல்லது ஓர் உயர் அதிகாரியாக இருந்தாலும், அதிகாரத்திலும் செல்வத்திலும் மேலும் மேலும் உயர வேண்டும் என்ற ஆசை அனைவரிடமும் காணப்படுகிறது. எவரும் தங்களிடம் இருப்பதைக் கொண்டு திருப்தி அடைவதில்லை.

இன்றைய மனிதனின் பேராசை எந்த அளவிற்குச் சென்றுவிட்டது என்றால், நல்லது எது, தவறானது எது என்பதைப் பகுத்தறியும் அடிப்படை அறிவைக்கூட இழந்து வருகிறான். உதாரணமாக, நாளிதழில் 'இறைவன் பதவிக்கு விண்ணப்பங்கள் வரவேற்கப்படுகின்றன' என்று ஓர் அறிவிப்பு வெளியிடப்பட்டால், மறுநாளே ஏராளமான விண்ணப்பங்கள் குவிந்துவிடும்! அந்தப் பதவிக்குத் தங்களுக்குத் தேவையான தகுதியும் தூய்மையான மனப்பான்மையும் இருக்கிறதா என்று கூட அவர்கள் சிந்திப்பதில்லை.

மனித மாண்பையும் கண்ணியத்தையும் பொருட்படுத்தாமல், கிடைக்கும் ஒவ்வொரு வாய்ப்பையும் அடைய வேண்டும் என்ற பேராசையுடன் மக்கள் அலைகின்றனர். ஆனால், ஒவ்வொருவரும் தங்களுக்குரிய கடமைகளைப் பொறுப்புணர்வுடனும் நேர்மையுடனும் நிறைவேற்றுவதே அவசியமாகும்.

சொல்வது ஒன்று, செய்வது வேறொன்று என்ற நிலை இன்று பலருடைய வாழ்க்கை முறையாகிவிட்டது. மற்றவர்களுக்கு அறிவுரை கூறுவதில் ஆர்வம் காட்டும் மனிதர்கள், தாங்கள் கூறும் நற்பண்புகளையும் உயர்ந்த கொள்கைகளையும் தங்கள் வாழ்க்கையில் கடைப்பிடிப்பதில்லை.

மக்கள் தங்கள் அன்றாட வாழ்க்கையில் உயர்ந்த இலட்சியங்களையும் நற்பண்புகளையும் நடைமுறைப்படுத்தத் தொடங்கும்போதுதான் நாட்டில் அமைதியும், செழிப்பும், நேர்மையும் நிலைபெறும். எனவே, வெறும் அறிவுரைகளால் பயனில்லை; நாம் போதிக்கும் உயர்ந்த நெறிகளை முதலில் நமது வாழ்க்கையில் கடைப்பிடித்து, பிறருக்கு முன்மாதிரியாக வாழ வேண்டும்.

சுயநலத்தைத் துறந்து சமுதாய நலனுக்காக வாழ்வோம்!

 ‘எனது வாழ்க்கையில் வசதிகளை எவ்வாறு, எந்தெந்த வழிகளில் அதிகரித்துக் கொள்ளலாம்?’ என்பதே இன்று பெரும்பாலான மக்களின் கவலையாக உள்ளது. ஆனால், தம்மால் மற்றவர்களுக்கு எத்தகைய மகிழ்ச்சியை அளிக்க முடியும், எத்தகைய ஆனந்தத்தைப் பிறருடன் பகிர்ந்து கொள்ள முடியும், தமக்குரிய கடமைகளை எவ்வாறு நிறைவேற்ற முடியும் என்பதைப் பற்றி எவரும் பெரிதாகச் சிந்திப்பதில்லை.

மற்றவர்கள் தமக்கு எவ்வளவு மகிழ்ச்சியை அளிக்க முடியும், சமுதாயத்திலிருந்து எவ்வளவு இன்பத்தைப் பெற முடியும், சமுதாயம் தமக்கு ஆற்ற வேண்டிய கடமைகள் என்னென்ன என்பதையே ஒவ்வொருவரும் கணக்கிட்டுக் கொண்டிருக்கின்றனர். தங்களுடைய ஆசைகளையும் தேவைகளையும் விட, தங்களுடைய பொறுப்புகளுக்கு முக்கியத்துவம் கொடுப்பவர்கள் மிகச் சிலரே.

‘ஒரு தனிமனிதனாக, இந்தச் சமுதாயத்திலிருந்து என்னால் அதிகபட்சப் பயனை எவ்வாறு பெற முடியும்?’ என்பதே பலருடைய எண்ணமாக இருக்கிறது. ஆனால், தாங்கள் அங்கம் வகிக்கும் சமுதாயத்தின் பாதுகாப்பையும் வளத்தையும் பேணிப் பாதுகாப்பது தங்களுடைய முதன்மையான கடமை என்பதை மக்கள் மறந்துவிடுகின்றனர்.

ஒரு தனிமனிதன் தனது சுயநல ஆசைகளையும் விருப்பங்களையும் தியாகம் செய்து, சமுதாய நலனுக்காக உழைக்க முன்வரும்போதுதான் நாடு செழிப்படையும். அத்தகைய மனப்பான்மை மக்களிடையே உருவாகும்போதுதான் உலகில் அமைதியும் நிலவும்.

இதனால்தான் வேதங்கள், மனிதன் தனது சுயநல ஆசைகளையும் விருப்பங்களையும் துறக்கும்போதுதான் உண்மையான அமைதியைப் பெற முடியும் என்று பறைசாற்றுகின்றன. செல்வத்தைத் தொடர்ந்து குவித்துக் கொண்டிருப்பவர்களையும், உடல் சார்ந்த சுகபோகங்களைப் பெருக்கிக் கொள்வதிலேயே எப்போதும் ஈடுபட்டிருப்பவர்களையும் வேதங்கள் கண்டிக்கின்றன.

எனவே, நமது சொந்த மகிழ்ச்சிக்காக மட்டும் பாடுபடாமல், அனைவருடைய மகிழ்ச்சிக்காகவும் உழைக்க வேண்டும். அவ்வாறு நாம் செயல்படும்போது, மற்றவர்களுக்கு மகிழ்ச்சியை அளித்த மனநிறைவுடன், அதைவிடப் பெருமளவிலான மகிழ்ச்சியையும் ஆனந்தத்தையும் நாமும் அனுபவிக்க முடியும்.

சுயநலத்தைத் துறந்து, பொதுநலத்தைப் போற்றி வாழ்வதே தனிமனித மகிழ்ச்சிக்கும், சமுதாய முன்னேற்றத்திற்கும், உலக அமைதிக்கும் வழிவகுக்கும்.

ஆசைகளைக் கட்டுப்படுத்துவோம் – துன்பங்களிலிருந்து விடுபடுவோம்!

 பேராசை, பயம், கோபம் ஆகியவற்றால் ஆட்கொள்ளப்பட்ட எந்த மனிதனாலும் இந்த உலகில் எதையும் சாதிக்க முடியாது. இவற்றுள் முதன்மையானது பேராசையாகும். அளவுக்கு மீறிய ஆசைகள் மனிதனைத் தாழ்ந்த நிலைக்குக் கொண்டு செல்கின்றன.

ஆசைகளை முற்றிலுமாகத் துறந்துவிட முடியாது. ஆனால், அவற்றிற்கு ஒரு வரம்பு இருக்க வேண்டும். அந்த வரம்பை ஆசைகள் மீறும்போது, மனிதன் தவறான பாதையில் செல்லத் தொடங்குகிறான். ஆசைகள் மிகவும் ஆபத்தானவை. இன்று நமக்கு எதிரியாக இருப்பவர் நாளை நண்பராக மாறலாம்; அதேபோல், நண்பராக இருப்பவர் எதிரியாகவும் மாறலாம். ஆனால், ஆசைகள் எப்போதும் மனிதனின் நிரந்தர எதிரிகளாகவே இருக்கின்றன. அவை இடைவிடாமல் மனிதனைத் துரத்திக் கொண்டே இருக்கின்றன.

பகவத்கீதை ஆசையை மனிதனின் நித்ய சத்ரு (நிரந்தர எதிரி) என்று குறிப்பிடுகிறது. எனவே, ஆசைகளை நாம் கட்டுப்பாட்டிற்குள் வைத்திருக்க வேண்டியது அவசியமாகும்.

மன அமைதியை இழந்து தவிக்கும் மனிதன், பல்வேறு வழிகளில் இறைவனை நாடுகிறான். இருப்பினும், அவன் தனது விருப்பங்களை ஏன் நிறைவேற்றிக் கொள்ள முடியவில்லை? அவனுடைய துன்பத்திற்கான உண்மையான காரணம் என்ன? நிறைவேறாத ஆசைகளா அல்லது அவனுடைய முயற்சிகள் தோல்வியடைந்ததா? பல்வேறு பொருள்களைப் பெற முடியாததாலா அல்லது லாட்டரியில் பரிசு கிடைக்காததாலா அவன் துயரப்படுகிறான்?

இத்தகைய அற்பமான விஷயங்களுக்காகப் புலம்பிக் கொண்டிருக்கும் இன்றைய மனிதன், தனக்குள் உறைந்திருக்கும் தெய்வீகத் தன்மையை மறந்து வாழ்கிறான். உண்மையில், இவை எதுவும் மனிதனுடைய உண்மையான துன்பங்களல்ல.

மனிதனுடைய துயரங்களுக்கான உண்மையான காரணம், உடலின் மீதான பற்றுதலும், தன்னையே இந்த உடலாகக் கருதும் அறியாமையும்தான். 'நான்', 'எனது' என்ற இரு எண்ணங்களிலிருந்தே அனைத்து விதமான துன்பங்களும் தோன்றுகின்றன.

எனவே, ஆன்மிக முன்னேற்றத்தை நாடும் மனிதன் முதலில் தேஹாபிமானம் (உடல் மீதான பற்று) என்பதைக் குறைத்துக் கொள்ள வேண்டியது மிகவும் அவசியமாகும். உடலே தான் என்ற எண்ணத்தை விடுத்து, தனக்குள் இருக்கும் ஆத்ம தெய்வீகத்தை உணர முயல வேண்டும். அப்போதுதான் ஆசைகளின் பிடியிலிருந்து விடுபட்டு உண்மையான மன அமைதியையும் ஆனந்தத்தையும் அடைய முடியும்.

அனைவரையும் மதித்து அன்புடன் வாழ்வோம் – அன்பே இறைவன்!

 இறைவனின் ஆத்ம தத்துவம் அனைத்து உயிர்களிலும் நிறைந்துள்ளது. எனவே, ஒவ்வொருவரையும் மதித்து நடக்க வேண்டும். அனைவரையும் மதிப்பதே உண்மையான இறை வழிபாடாகும். நீங்கள் மற்றவர்களிடமிருந்து மதிப்பைப் பெற விரும்பினால், முதலில் மற்றவர்களை மதிக்கக் கற்றுக்கொள்ள வேண்டும். பிறருக்கு மரியாதை அளியுங்கள்; அதற்குரிய மரியாதையைப் பெற்றுக் கொள்ளுங்கள்.

இறைவனின் அடிப்படைத் தத்துவமான ஒருமைப்பாட்டை நாம் புரிந்துகொள்ள வேண்டும். வேதங்கள், “ஏகம் சத் விப்ரா பஹுதா வதந்தி” (உண்மை ஒன்றே; ஞானிகள் அதனைப் பல்வேறு பெயர்களால் அழைக்கின்றனர்) என்று பறைசாற்றுகின்றன.

இறைவனை நீங்கள் எந்தப் பெயராலும், எந்த உருவத்தாலும் அழைக்கலாம். ஆனால், இறைவன் ஒருவனே! இந்த ஒருமைப்பாட்டுத் தத்துவத்தை நமது இதயத்தில் ஆழமாகப் பதிய வைத்துக் கொள்ள வேண்டும்.

இறைவன் ஒவ்வொருவரிடத்திலும் அன்பின் வடிவமாக வீற்றிருக்கின்றான். நீங்கள் எங்கு சென்றாலும் அவன் உங்களுடன் இருக்கின்றான். அவன் அனைத்தையும் அறிந்தும், அனைத்திற்கும் சாட்சியாகவும் விளங்குகின்றான்.

உங்களிடமுள்ள அன்பைப் பிறருடன் பகிர்ந்து கொள்ளுங்கள்; அவர்களிடமிருந்து அன்பைப் பெற்றுக் கொள்ளுங்கள். அன்பே மனிதனிடம் இருக்க வேண்டிய மிக உயர்ந்த நற்பண்பாகும். அன்பு எல்லையற்ற மகிழ்ச்சியையும் பேரானந்தத்தையும் அளிக்கிறது. அன்பு நிறைந்த இதயத்தில்தான் இறைவன் குடியிருக்கின்றான். எனவே, நமது இதயத்தை அன்பால் நிரப்பிக் கொள்வது மிகவும் அவசியமாகும்.

எங்கே அன்பு இருக்கிறதோ, அங்கே இறைவன் இருக்கின்றான். அவனைத் தேடி நீங்கள் எங்கும் அலைய வேண்டியதில்லை. அவன் எப்போதும் உங்களுக்குள்ளும், உங்களுடனும், உங்களைச் சுற்றிலும், உங்களுக்கு மேலேயும், கீழேயும் நிறைந்திருக்கின்றான்.

எனவே, அன்பு என்னும் உயரிய தத்துவத்தை உறுதியாகக் கடைப்பிடித்து வாழ வேண்டும். ஒருபோதும் எவரையும் வெறுக்காதீர்கள். வெறுப்பே மனிதனின் மிகக் கொடிய எதிரியாகும். நமது உள்ளத்தில் உண்மையான அன்பு வளரும்போது, வெறுப்பு இயல்பாகவே மறைந்துவிடும்.

அன்பைப் பகிர்வோம்; அனைவரையும் மதிப்போம்; இறைவனின் ஒருமைப்பாட்டை உணர்ந்து வாழ்வோம்!

மனிதனின் உண்மை இயல்பு – தெய்வீக சக்தியின் வெளிப்பாடு

 ஒவ்வொரு மனிதனும் பொருள் நிலை (Materialisation), அதிர்வு (Vibration), கதிர்வீச்சு (Radiation) ஆகிய மூன்று அம்சங்களின் ஒருங்கிணைப்பாக விளங்குகின்றான்.

மனித உடலும் அதன் அனைத்து உறுப்புகளும் தசைகளும் இணைந்த அமைப்பு பொருள் நிலை எனப்படுகிறது. மனிதனுக்குள் செயல்படும் உயிர்ச்சக்தி (பிராண சக்தி – Prana Shakti) அதிர்வு எனப்படுகிறது. இந்த இரண்டையும் ஒருங்கிணைத்து இயக்குவது ஆத்ம சக்தியால் வெளிப்படும் கதிர்வீச்சாகும்.

மனிதனுக்குள் அனைத்து தெய்வீக சக்திகளும் மறைந்த நிலையில் நிறைந்துள்ளன. ஆனால், மனிதன் அவற்றின் மீது தனது கவனத்தைச் செலுத்துவதில்லை. அவன் தன்னையே இந்த உடலாகக் கருதிக் கொள்கிறான். ஆனால், உண்மையில் அவன் உடல் அல்ல.

இல்லையெனில், 'இது என்னுடைய உடல்' என்று அவன் ஏன் கூற வேண்டும்? 'இது என்னுடைய உடல்' என்று கூறும்போதே, அந்த உடலிலிருந்து தான் வேறுபட்டவன் என்பது தெளிவாகிறது. இருப்பினும், மனிதன் தன்னையே உடலாக எண்ணி மயங்குகிறான். இந்தத் தவறான அடையாள உணர்வினால், தனக்குள் இயல்பாகவே விளங்கும் தெய்வீக ஒளியையும் பிரகாசத்தையும் இழந்து வருகிறான்.

அதிர்வு என்பது சுவாசிக்கும் செயல்முறையைக் குறிக்கிறது. சில நேரங்களில் மனிதர்கள், 'எனது சுவாசம் சீராக இல்லை' என்று கூறுகிறார்கள். இவ்வாறு கூறுவதன் மூலமே, சுவாசத்திலிருந்து தாம் வேறுபட்டவர்கள் என்பதை அவர்கள் அறியாமல் வெளிப்படுத்துகிறார்கள்.

'பஷ்யன்னபி ச ந பஷ்யதி மூடோ' (Pashyannapicha na pashyati moodho) என்ற கூற்றின்படி, கண்களால் பார்த்தும் உண்மையை உணராதவனே மூடன் ஆவான்.

தான் அல்லாத ஒன்றைத் தானாகக் கருதிக் கொள்வதன் காரணமாக, மனிதன் அறியாமையில் மூழ்கிக் கிடக்கிறான். உண்மையில், கதிர்வீச்சு (Radiation) என்பது தெய்வீகமானது. அதுவே மனிதனின் உண்மையான இயல்பாகும்.

இந்தக் கதிர்வீச்சு என்பது ஒவ்வொரு மனிதனுக்குள்ளும் மறைந்திருக்கும் காந்த சக்தியாகும். கோயில்களிலும் இதே தெய்வீக சக்தி நிறைந்துள்ளது. அந்தச் சக்தியே மக்களைத் தன்பால் ஈர்க்கிறது. காந்தத் தன்மையும் ஈர்ப்புச் சக்தியும் அனைத்து ஆலயங்களின் இயல்பாக விளங்குகின்றன.

எனவே, மனிதன் தன்னை வெறும் உடலாகக் கருதாமல், தனக்குள் நிறைந்திருக்கும் பிராண சக்தியையும் ஆத்ம சக்தியையும் உணர வேண்டும். உடல், உயிர், ஆத்மா ஆகியவற்றின் உண்மையான தொடர்பைப் புரிந்துகொண்டு, தனக்குள் மறைந்திருக்கும் தெய்வீக ஒளியை வெளிப்படுத்துவதே மனிதப் பிறவியின் உயர்ந்த நோக்கமாகும்.

பணக்காரப் பெண் - பொன் விழா ஆண்டில் இந்த படங்கள் - ச. சுந்தரதாஸ்

எம் ஜி ஆர், சிவாஜி இருவரும் சினிமாவில் உச்சம் தொட்ட கால கட்டத்தில் சிறிய தயாரிப்பாளர்களின் ஆபத்பாந்தவனாகத் திகழ்ந்தவர் ஜெய்சங்கர். குறைந்த செலவு, நிறைந்த இலாபம் என்ற வகையில் பலர் இவரை ஹீரோவாகப் போட்டு படம் எடுத்துக் கொண்டிருந்தார்கள். அப்படி உருவான ஒரு படம்தான் பணக்காரப் பெண். 

 படத்தை தயாரித்தவர் பி எல் மோகன்ராம். எல்லோரும் சிறிய நடிகர்களை போட்டு படம் எடுத்து , பின்னர் பெரிய நடிகர்களிடம் செல்வது வழக்கம். ஆனால் இந்த மோகன்ராம் இதற்கு மாறாக செயல்பட்டார். எம் ஜி ஆர் இரட்டை வேடங்களில் நடித்த ஆசைமுகம் படத்தை 1965ல் தயாரித்து விட்டு பின்னர் ஜெய்சங்கரிடம் வந்தவர் அப்படியே அவரின் நிரந்தர படத் தயாரிப்பாளராகி தங்கி விட்டார். 

 ஜெய்சங்கர் , ஜெயலலிதா ஜோடியில் ராஜா வீட்டுப் பிள்ளை படத்தை

எடுத்தவர் அதே ஜோடி நடிப்பில் முத்துச் சிப்பி , தங்ககோபுரம், படங்களையும் தயாரித்தார். பின்னர் ஜெய்சங்கர் நடிப்பில் மன்னிப்பு படத்தை எடுத்து விட்டு 1976ல் பணக்காரப் பெண் படத்தை உருவாக்கினார். இதில் ஜெய்சங்கருக்கு இணை ஜெயலலிதா அல்ல , ஜெயசித்ரா. 

 ராதா ஒரு பணக்காரப் பெண். அவளின் தந்தையை கொலை செய்து , பின்னர் ராதாவை மனநோயாளியாக்கி விட்டு சொத்தை சுருட்ட திட்டம் போடுகிறார்கள் அவளின் உறவினர்களான சோமுவும், மாசிலாமணியும். ராதாவின் தந்தை இவர்களால் கொல்லப்பட , எதிர்பாரா விதமாய் ராதா தான் காதலிக்கும் ராஜாவை கல்யாணம் செய்து கொள்கிறாள். இப்போது ராதாவை கொன்று விட்டு பழியை ராஜா மீது சுமத்த பிளான் பண்ணுகிறார்கள். ஆரம்பத்தில் சோமு, மாசிலாமணி இருவரையும் நம்பும் ராதா , ராஜா இருவரும் பின்னர்தான் சுதாகரித்துக் கொள்கிறார்கள். அதன் பின் எப்படி அவர்களின் பதிலடி அமைந்தது என்பது மீதி படம். 

 சும்மா சொல்லக் கூடாது , படம் முழுவதும் ஒரே சதித் திட்டம்தான். இவ்வளவு சதிகளை அன்றைய சீசனில் ஒரு படத்தில் பார்ப்பது என்பதும் அபூர்வம்தான். 

இலங்கைச் செய்திகள்

பணமோசடி வழக்கு: யோஷித ராஜபக்‌ஷவுக்கு எதிரான சாட்சி விசாரணை கொழும்பு மேல் நீதிமன்றில் ஆரம்பம்!

இஸ்ரேலில் இலங்கை வேலைவாய்ப்புகள் இனி அரசாங்க ஒப்பந்தம் மூலம் மட்டுமே : புதிய உத்தரவு

ரகித ராஜபக்‌ஷவின் வங்கிக் கணக்குகள் இடைநிறுத்தம்

இலங்கையில் வருடாந்தம் 6000 புதிய மார்பகப் புற்றுநோயாளர்கள் பதிவு ; சுமார் 1,000 பெண்கள் உயிரிழப்பு 


பணமோசடி வழக்கு: யோஷித ராஜபக்‌ஷவுக்கு எதிரான சாட்சி விசாரணை கொழும்பு மேல் நீதிமன்றில் ஆரம்பம்!

30 Oct, 2026 | 11:32 AM

பணமோசடி தடுப்புச் சட்டத்தின் கீழ் யோஷித ராஜபக்‌ஷவுக்கு எதிராகச் சட்டமா அதிபரால் தாக்கல் செய்யப்பட்டுள்ள வழக்கின் மேலதிக சாட்சி விசாரணை கொழும்பு மேல் நீதிமன்றத்தில் ஆரம்பமாகியுள்ளது.

கொழும்பு மேல் நீதிமன்ற நீதிபதி உதேஷ் ரணதுங்க முன்னிலையில் இந்த வழக்கு விசாரணை இன்று வெள்ளிக்கிழமை (30) நடைபெற்று வருகின்றது.

இதன்போது, முறைப்பாட்டாளர் தரப்பில் ஆஜரான பிரதி சொலிசிட்டர் ஜெனரல் ஜனக பண்டாரவின் வழிநடத்தலின் கீழ் சாட்சி விசாரணை ஆரம்பிக்கப்பட்டுள்ளது.

உலகச் செய்திகள்

நேருக்கு நேர் மோதிக்கொண்ட இரு அதிவேக ரயில்கள் ; இந்த ஆண்டில் ஸ்பெயினில் 2வது கோர விபத்து ; உயிரிழந்தோர் எண்ணிக்கை 68ஆக அதிகரிப்பு ; 80க்கு மேற்பட்டோர் படுகாயம்

பெரும்பான்மை இல்லை ; மீண்டும் தேர்தலை நடத்த வேண்டாம்: இஸ்ரேல் ஜனாதிபதி கட்சிகளிடம் கோரிக்கை

சவூதியின் விமான நிலையங்கள், இராணுவ தளம் உள்ளிட்ட பல இடங்களில் ஹூதி கிளர்ச்சியாளர்கள் தாக்குதல்

12 ஆண்டுகளுக்குப் பின் திறக்கப்பட்ட பாலம் வழியாக சீனா சென்றார் வடகொரிய ஜனாதிபதி

ஜேர்மனியில் ஜென்சி இளைஞர்கள் போராட்டங்கள்: பிராங்போர்ட்டில் கடைகள் சூறையாடல், வன்முறை!  



நேருக்கு நேர் மோதிக்கொண்ட இரு அதிவேக ரயில்கள் ; இந்த ஆண்டில் ஸ்பெயினில் 2வது கோர விபத்து ; உயிரிழந்தோர் எண்ணிக்கை 68ஆக அதிகரிப்பு ; 80க்கு மேற்பட்டோர் படுகாயம்  

29 Oct, 2026 | 12:00 PM

ஸ்பெனில் நேற்று புதன்கிழமை (28) இரு அதிவேக ரயில்கள் நேருக்கு நேர் மோதி விபத்துக்குள்ளானதில் உயிரிழந்தோரின் எண்ணிக்கை 68ஆக அதிகரித்துள்ளதாக அந்நாட்டு அதிகாரிகள் தெரிவிக்கின்றனர்.

மேலும் இந்த விபத்தில் குறைந்தது 80 பேர் படுகாயமடைந்துள்ளதாகவும் இவர்களில் சிலரது நிலைமை கவலைக்கிடமாக இருப்பதாகவும் உயிரிழப்பு எண்ணிக்கை தொடர்ந்து அதிகரிக்க வாய்ப்புள்ளதாகவும் தெரிவிக்கப்படுகிறது. 

டொலெடோ மாகாணத்தில் உர்டா மற்றும் லாஸ் யெபெனெஸ் நகரங்களுக்கு இடைப்பட்ட ரயில் மார்க்கத்தில் இந்த விபத்து இடம்பெற்றுள்ளது. 

நூல் வெளியீட்டுவிழா அழைப்பு 7/11/2026

 அமெரிக்காவில், கலிஃபோர்ணியாவில் வசிக்கும், திரு. விக்டர்


இராஜலிங்கம் அவர்களின், "உலகின் மூத்தமொழி, தமிழ்மொழி" என்ற நூலின் வெளியீட்டுவிழா, அவுஸ்திரேலியாவில்,  மெல்பேணில் எதிர்வரும்,  2026, நொவெம்பர் 7 ஆம் திகதி சனிக்கிழமை, மாலை நடைபெறவுள்ளது.

மேலதிக விபரங்கள்,  இத்துடன் இணைக்கப்பட்டுள்ள, பிரசுரத்தில் உள்ளன. அனைவரும் அன்புடன் அழைக்கப்படுகின்றார்கள்.



நவம்பர் 15- 11- 26 மாலை 3-30, மாத்தளைசோமுவின் இரு நூல் வெளியீடு Wentworth Ville community Centre, Graville room, (redgum center)

 






































முத்தமிழ் மாலை 26 - 06/12/2026