நன்றி தினகரன்
மழைக்காற்று - ( தொடர்கதை ) அங்கம் 60 முருகபூபதி
அ பிதா… என்னம்மா… உறக்கமா…? எனக்காக சமைத்து படையலும் வைத்து களைத்துப்போனாயா…? உறங்கு… உறங்கு… கண்ணுறங்கு மகளே… உண்ட களை தொண்டருக்கும் உண்டாம். நீயோ… இங்கே வந்தது முதல் வேலை… வேலையே வாழ்க்கை என்று காலத்தை ஓட்டுகிறாய். யார்தான் உனக்கு ஓய்வு தந்தார்கள்.
சமைத்துப்பரிமாறி, பாத்திரம் கழுவித்துடைத்து, வீட்டை கூட்டித் துப்பரவுசெய்து, அவகள் அணிந்து களைந்து போட்டுவிடும் உள்ளாடை முதற்கொண்டு அனைத்தையும் துவைத்து காயப்போட்டு உலரவைத்து, அவகளுக்குத் தேவைப்படும்போதெல்லாம் அவற்றை ஸ்திரிபோட்டு அயன்செய்து மடித்துக்கொடுத்து, அவகள் வேலைக்குச்செல்லும்போது, அணியும் சேலையின் கீழ் விளிம்பில் மடிப்பு வராமல் நிமிர்த்திவிட்டு சரிகைக்கும் பிளவுஸுக்கும் ஊசி குத்திவிட்டு, சாப்பாட்டு கெரியரையும், தண்ணீர்போத்தலையும் எடுத்துக்கொடுத்து, கைப்பையையும் கைத்தொலைபேசியையும் நினைவூட்டி வழியனுப்பியதோடு உன்ர வேலை முடியவில்லையே… அந்த ரீச்சரம்மாவுக்கு கால் உளைவு வரும்போதெல்லாம் எண்ணெய் பூசி தடவிவிட்டு, உறங்கவைத்ததுடன் நின்றாயா… அதுவும் இல்லையே… அந்தப்பெட்டைகள் ரெண்டுபேரின் சோகக்கதைகளை கேட்டு ஆறுதலும் சொல்லி, பாட்டும் பாடி அவளுகளை உற்சாகப்படுத்தினாயே… இவ்வளவும் செய்தும் என்னத்தை கண்டாய். அவள் ஜீவிகா, காதலனுடன் சுற்றப்போனவேளைகளில் வீட்டில் கண்விழித்து காவல் இருந்தாயே… உறங்கு… உறங்கு… இப்போது எல்லோரும் அவரவர் பாட்டை பார்த்துக்கொண்டு போய்விட்டார்கள்… காலமிது காலமிது கண்ணுறங்கு மகளே… என்ர புருஷன், என்ன செய்தார்..? நான் பாரிசவாதம் வந்து படுக்கையில் விழுந்ததும், எனக்கு பணிவிடை செய்யவந்த பெண்களுடன் ஆடிய சரசங்கள் எனக்குத் தெரியாது என்றா நினைக்கிறாய்.. இப்போது எனது தினம் வருகிறது. படையல் போடச்சொல்கிறார். ஊரிலிருந்த எனக்குத்தந்த சீதன வீட்டை விற்றுத்தான் இந்த வீட்டை அவர் வாங்கினார். என்னுடைய
சேமிப்பிலிருந்ததை கொடுத்துத்தான் என்ர மகனையும் மகளையும் லண்டனுக்கு படிக்க அனுப்பினன். போனவிடத்தில் தங்களை செட்டில் பண்ணிக்கொள்வதில் காண்பித்த அக்கறையை என்னை ஒரு எட்டு வந்து பார்த்துவிட்டுப்போவதற்கு காண்பிக்காத பிள்ளைகள். உனக்குத் தெரியுமா, அதுகளின்ட குழந்தைகளையும் , அதுதான் என்ர பேரக்குஞ்சுகளையும் நான் படங்களில்தான் பார்த்திருக்கிறன. சிலவேளை நான் செத்தபிறகு என்ர மகன் கொள்ளி வைக்க வந்திருப்பான். ஆனால், தெரியாது, நான்தான் செத்துப்போனேனே…. இப்போது இந்த வீட்டை வித்துப்போட்டு இலங்கைக்காசுக்கு லண்டன் பவுண்ஸ் எவ்வளவு வரும் என்று அண்ணனும் தங்கச்சியும் கணக்குப்பார்க்குதுகள். நீ… எதற்காக இங்கே வந்தாய்… நீ வரவில்லை… விதி உன்னை இங்கே என்னிடம் வரவழைத்திருக்கிறது. அந்தப்பாலகன், அவன்தான் உன்னுடன் இப்போது புதிதாக சிநேகிதம் கொண்டாடுகிறாளே… தமயந்தியின் மகன்… என்ன சொன்னான் பார்த்தாயா.. கடவுளும் குழந்தையும் ஒன்றுதான். அந்தச்சிறுவனின் வாக்கு பலிக்கும். இந்த வீட்டை யாரும் வாங்கமாட்டார்கள். வீடு விற்கப்படாது. நான் இங்கே நடமாடுகிறேன். நீதான் இந்த வீட்டின் எஜமானி. அவள் ஜீவிகா அல்ல. அவள் போய்விடுவாள். தினமும் எனக்கு நீ பூச்சரம் சூட்டி, தண்ணீர் வைத்து விளக்கேற்றி வணங்குகிறாய். ஆனால், லண்டனில் எனது படத்தை எவரும் கணக்கில் எடுப்பதும் இல்லை. அவர்… நீதான் அடிக்கொரு தடவை லண்டன்காரர்… லண்டன்காரர் என்று சொல்வாயே… நான் பிறந்த நாள், இறந்த நாள் மாத்திரம்தான் அந்த ஆளின்ரை நினைவில் இருக்கும். மற்றும்படி அந்த ஆளுடன் சரசமாடியவள்களின் முகமும் உடலும்தான் நினைவில் தங்கியிருக்கும்… நீ… உறங்கு மகளே… உறங்கு…. நீ… இவ்வாறு பகல் உறக்கம் கண்டு எத்தனை வருடமிருக்கும்…? போர் உக்கிரமடையமுன்னர் ஒரு பகல்பொழுதில்தானே உனக்கும் உனது கணவனுக்கு முதல் பகல் வந்தது. அந்த முதல் பகலில்தானே உன்குழந்தையும் உனக்குள் உயிராகியது. நினைவிருக்கிறதா…..?
நேசம்
Dr.Fajila Azad
(International Life Coach – Mentor – Facilitator)
fajila@hotmail.com FB:fajilaazad.dr youtube:FajilaAzad
dr. ஃபஜிலா ஆசாத், சர்வதேச வாழ்வியல் ஆலோசகர்
‘இதை வைத்துக் கொள்ளுங்கள்’, விரலிலிருந்த முத்திரை மோதிரத்தை மிக இலாவகமாக கழற்றி அந்த அரசர் தன் அருகே நின்ற விறகு வெட்டியிடம் நெகிழ்ச்சியோடு கொடுக்க அவரோ வேண்டாமென்று விடாப் பிடியாக மறுத்துக் கொண்டிருந்தார். அவர் முகம் மகிழ்ச்சியால் மிளிர்ந்து கொண்டிருந்தது.
அந்த விறகு வெட்டிக்கு மட்டுமல்ல உங்களுக்குமே இது போல் மகிழ்வான நிகழ்வுகள் அமையலாம். உங்களால் பிறர் மனதில் முத்திரை பதிக்க முடிந்தால்……
அன்றும் எல்லா வார இறுதி நாட்கள் போல் தான் அரசரும் இளவரசரும் வேட்டைக்கு சென்றார்கள். ஆனால் அன்று தங்களுக்கு போக்கு காட்டிய மானை துரத்திக் கொண்டே வந்தவர்கள் வழி தவறி அடர்ந்த காட்டுக்குள் மாட்டிக் கொண்டார்கள்.
களைப்பும் சலிப்பும் தவிப்புமாக எங்காவது குடிக்க தண்ணீர் கிடைக்காதா, தன் நாட்டிற்கு திரும்பி செல்ல வழி தென்படாதா என சுற்றுமுற்றும் பார்த்துக் கொண்டே நடந்தவர்கள் கண்களில் ஒரு விறகு வெட்டி தென்படுகிறார்.
சக்தியாய் நின்றாய் - Chelliah Paskaran
கண்விழித் தாமரை
கனிந்து நோக்கிடும்
என்னுயிர் தாரகை நீ
விண்ணதில் மின்னிடும்
பொன்னொளி காட்டும்
தண்மதி போன்றவள் நீ
வாளெனக் கண் மடல்
வெட்டி மறைத்துதிடும்
விழியினால் கொன்றவள் நீ
பேசிடும் மொழியிலும்
வீசிடும் இலக்கணம்
பொழிப்புரை சொல்பவள் நீ
மானுட வாழ்வில் வென்று நிலைத்திட
வாய்மொழி கொண்டவள் நீ
அடங்கிப் கிடந்தவள்
விழித்து எழுந்திடின்
அகிலம் அதிரும் என்று
செருக்கிடை மேவிய
நிமிர்நடை கொண்டவள்
நேரில் வருகை கண்டேன்
ஆண்மகன் என்றிட்ட
ஆணவம் அழிந்தது
சக்தி என்றே வியந்தேன் .
-
மனித நேயம்
உள்ளமதிற் கிளர்த்தெழும்நற் குணங்கள்பல இணைந்த
உயர்ந்ததனிப் பெருங்குணமே மனிதநேயம் அன்றோ?
வள்ளுவனார் குறள்கொண்டு மனிதநேயம் உரைத்தார்!
மாதவத்துத் திருமூலர் மந்திரமாய்த் தந்தார்!
தெள்ளுதமிழ்த் திருமுறைகள் அள்ளியள்ளி முகிழ்த்தன
சித்தர்கள் பலர்தோன்றிச் சிறப்பாக வளர்த்தனர்
கொள்ளைபோகா ததனைவருஞ் சந்ததியர் வளர்க்கக்
குழந்தைகளை வழிநடத்தல் பெற்றோர்கடன் அன்றோ?
ஹாலோவீன் சொக்கிளேற்று
வெளியே சிறுவர்களின் ஆர்ப்பரிப்பு ஒலி சனிக்கிழமை மதிய நேர நித்திரையைக் கலைத்து விட்டது.
மேல்மாடிப் படுக்கை அறையின் சன்னலின் இடுக்குகள் வழியே எட்டிப் பார்க்கிறேன். கீழே பரந்து விரிந்த முன் பக்க வீடுகளில் ஒன்றின் முன் நின்று கதவைத் தட்டிக் கொண்டிருக்கிறார்கள் அந்த நான்கு சிறுவர்களும். பேய், பிசாசு உடுப்பில் முகத்தில் ஒப்பனை வேறு செய்து கொண்டு, அவர்கள் கைகளில் ஆளுக்கொரு பை, அது நிறைய சொக்கிளேற் இனிப்புகளின் குவியல் என்று ரெலெஸ்கோப் வைக்காமலேயே ஊகிக்க முடிந்தது. ஒவ்வொரு வீடாகத் தட்டி இனிப்புப் பண்டங்களை வாங்கித் தம் பையில் போட்டுக் கொண்டிருக்கிறார்கள். இது ஒவ்வொரு வருடமும் வழக்கமாக நடப்பது தான்.
எங்கள் வீட்டில் இருந்து ஒரு ஐந்து நிமிட நடை தொலைவில் வீதியின் முடக்கில் அடுக்கடுக்காக இருக்கும் மூன்று வீடுகளில் இருக்கும் பையன்கள் தான் அவர்கள். பள்ளிக்கூடம் முடிந்த பின் வீட்டுக்கு வெளியே வந்து பந்து விளையாடிக் கொண்டிருப்பார்கள். அந்த அகண்ட பெரிய அந்த வீதியின் ஒரு பாதி அவர்களுக்குச் சில சமயம் உதைபந்தாட்ட மைதானம் போல. வாகனப் போக்குவரத்தும் அதிகம் இல்லாததால் அவர்களின் விளையாட்டுக்கு அது கை கொடுத்தது.
அரை மனதுடன் வீட்டுக்குள் வந்து விட்டேன். ஊரில் என்றால் இப்படி வீதியை மறித்து யார்ட், கிளித்தட்டு என்று எத்தனை விளையாட்டெல்லாம் விளையாடியிருக்கிறம். போன வாரம் கூட ஒரு காணொளியில் பாடகர் எஸ்.பி.பாலசுப்ரமணியம், தான் எங்காவது பயணித்துக் கொண்டிருக்கும் போது ஏதாவது கிராமப்புறத்தில் வழியோரத்தில் கிறிக்கெட் விளையாடும் பையன்களைக் கண்டால் அப்படியே காரை நிறுத்தி விட்டுப் பார்த்துக் கொண்டிருப்பாராம். மனைவி கூடக் கிண்டலடிப்பாராம் "போய் அம்பயர் வேலை பார்க்கலாமே?" என்று. எனக்கும் இந்தச் சிறுவர்களைக் கண்டால் அப்படியொரு ஆசையும் தொற்றிக் கொள்ளும், ஆனால் வயது விடாது. இந்த நாட்டுச் சூழலில் அந்நியர் கிட்ட வந்து பேசுவது கூட வேறு அர்த்தத்தில் மொழி பெயர்க்கப்பட்டு விடும்.
திரு. ஷர்தார் ஜமீல் அவர்களோடு ஒரு பேட்டி.
ஊடகத்துறையில் 20 ஆண்டுகளுக்கும் மேலாகத் தடம் பதித்த நண்பர் திரு. ஷர்தார் ஜமீல் அவர்களோடு ஒரு பேட்டி.
இந்தப் பேட்டியின் வழியாகத் தன்னுடைய ஊடக வாழ்வியல் அனுபவங்களோடு இலங்கையில் தனியார் வானொலிகள் முளை விட்ட காலத்தில் எழுந்த சவால்களையும், வாய்ப்புகளையும் பேசுகின்றார்.
நேற்று நவம்பர் 01 ஆம் திகதி - மிஸ்டர் தர்மிஸ்டரின் நினைவு தினம் ! அவச்சாவுகளைக்கண்ட அரசியல் சாணக்கியர் இயற்கை எய்திய தினம் !! - முருகபூபதி
இலங்கை சுதந்திரம் பெறுவதற்கு முன்னர் 1943 ஆம் ஆண்டு நடந்த சட்ட சபைத்தேர்தலில் ஒருவர் வெற்றிபெற்றார். களனி பிரதேசத்திலிருந்து முதல் முதலாக அவர் தெரிவாகும்போது அவரது வயது 37.
இலங்கையில் நீதித்துறை சார்ந்த ஒரு பெரியவருக்கும் செல்வந்த குடும்பத்திலிருந்து வந்த ஒரு பெண்மணிக்கும் பிறந்தவர்தான் அந்த களனி தொகுதியை பின்னாளில் பிரதிநிதித்துவப்படுத்தியவர்.
அவர் பிறந்த இல்லம் எது...? என்பதைச் சொன்னால் எவருக்கும் ஆச்சரியமாகவும் அதிசயமாகவும் இருக்கலாம்.
ஆனால், அதுதான் உண்மை! அந்த இல்லம் கொழும்பு வடக்கில், களனி கங்கைக்கும் ஆமர் வீதிக்கும் நடுவில் வரும் கிராண்ட்பாஸ் வீதியில் 185 ஆம் இலக்கத்தில் அமைந்துள்ளது. இன்றும் நீங்கள் அந்த இல்லத்தின் முகப்பினை பார்க்கலாம். அந்த இல்லத்தில், நீதிக்கும் செல்வச்செழிப்பிற்கும் பெயர் பெற்ற அந்தக்குடும்பம் வாழ்ந்த காலத்தில் 1906 ஆம் ஆண்டு செப்டெம்பர் மாதம் 17 ஆம் திகதி பிறந்த குழந்தையின் பெயர் ஜூனியஸ் ரிச்சர்ட்
ஜெயவர்தனா.
இலங்கை அரசியல் வரலாற்றின் ஏடுகளில் இவரது ஆளுமை குறிப்பிடத்தகுந்தது. எத்தனையோ சவால்களை முறியடித்து, தான் நினைத்தவற்றை பல்வேறு தந்திரோபாயங்களுடன் சாதித்தவர்.
இவரை ஜே.ஆர். எனவும் ஜே.ஆர். ஜெயவர்தனா எனவும் அழைப்பர். 1977 இல் நடந்த பொதுத்தேர்தலில் அறுதிப்பெரும்பான்மையுடன் வெற்றிபெற்றதையடுத்து, தார்மீக சமுதாயம் அமைப்பதுதான் தனது நோக்கம் என்றும் சொல்லி, அதனை தமது தாய் மொழியில் தர்மிஷ்ட சமாஜய என வர்ணித்தார்.
ஆனால், அந்த தார்மீக ஆட்சியில் 1977 – 1981 -1983 ஆம் ஆண்டுகளின் காலப்பகுதியில் நடந்த பல சம்பவங்களை பார்க்கும்போதும் அகில இலங்கை எங்கும் நிகழ்ந்த வன்முறைகள், தீவைப்புகள், படுகொலைகள் அனைத்தையும் சீர்தூக்கிப்பார்க்கும்போதும், அதுதான் அவர் கனவு கண்ட தார்மீக சமுதாயமா..? எனவும் கேட்கத்தோன்றும்.
இவரது பதவிக்காலத்தில்தான் யாழ்ப்பாணம் பொதுநூலகமும் கயவர்கள் ஏவிவிட்ட தீ அரக்கனுக்கும் பலியாகியது. அவரது அரசியல் எதிரிகள் அவரை "மிஸ்டர் தர்மிஸ்டர்" எனவும் அழைத்தனர். பதினொரு பிள்ளைகளில் மூத்த புதல்வனாக அவர் பிறந்த இல்லம்தான் ஒன்பது தசாப்தங்களுக்கு முன்பிருந்து வீரகேசரி நாளிதழ் வெளியாகும் கட்டிடம்! இலங்கை பிரித்தானியரின் ஆளுகைக்குள் இருந்த காலப்பகுதியில் பிறந்திருக்கும் ஜே.ஆர்., ஒரு கத்தோலிக்க குடும்பப்பின்னணியை கொண்டிருந்தவர்.
அறிவுத்தாகம் - - நாட்டியக் கலாநிதி கார்த்திகா கணேசர்
.
20-ஆம் நூற்றாண்டின் ஆரம்பத்தில் இருந்து யாழ்பாணத்தில் பிரபலமான தொழில் அப்புகாத்து பிறக்கிறசி எனப்படும் Advocate, Procecutor. காணி கொடுக்கல் வாங்கல் உறுதி எழுதுவது மற்றும் பெரிய அளவிலான வழக்குகள் என பலவற்றிற்கும் மக்கள் இவர்களை நாடவேண்டி இருந்தது. பிருத்தானியர் எம்மை ஆண்டு வந்தமையால் அவர்களே நிர்வாகத்தை நடத்தும் பொழுது, தம்மிடம் தம் முறையில் படித்த சட்டத்தரணிகளை வைத்து வழக்குகளை தீர்க்கும் முறையை கையாண்டார்கள். அதாவது பிருத்தானிய நீதி முறையில் படித்து பட்டம் பெற்றவரே இதை செய்யும் தகுதி பெற்றவராக இருந்தனர். இதனால் பலர் இத்தொழிலை கற்றுத் தேறினர். பிருத்தானியர் வரவிற்கு முன்பே கைகொள்ளப்பட்ட சட்டங்கள் இலங்கைக்கே உரித்தானவை. இவற்றை பிருத்தானிய அரசு ஏற்றுக்கொண்டே செயல்பட்டது. இவற்றில் யாழ்பாணத்திற்கே உரிய தேச வளமை, முஸ்லிம் மக்களுக்கான முறைமைகள், கண்டி பிரதேசத்திற்கான முறைமைகள் யாவும் ஏற்றுக் கொள்ளப்பட்டது.
எம்மவர் பலர் மேற்படிப்பிற்காக பிருத்தானியா நோக்கி சென்றனர். இது எனக்கு ஆதார பூர்வமாக தெரியாது. இருந்தும் மேல் படிப்பிற்காக பிருத்தானியா சென்ற தமிழர்கள் பொன்னம்பலம் இராமனாதனின் குடும்பத்தவராகவே இருக்கலாம். இவருக்கு பின் பிருத்தானியாவிற்கு படிக்கச் சென்றால், ஊர் மக்களுக்கு அப்படி படிக்க சென்றவர் என்ன படிக்கப்போகிறார் என்பது புரியாது. ஊர் வழக்கிலே அவர் இராமனாதனுக்கு படிக்க போய் இருக்கிறார் என்றே கூறுவார்களாம். எனது பெரியப்பா 1934இல் பிருத்தானியாவிற்கு படிக்கப் போயிருந்தார். அப்பொழுது இவ்வாறு தான் கூறினார்களாம். எமது ஊர் ஆன திருநெல்வேலியில் இந்து வாலிபர் சங்கம் இயங்கி வருகிறது. எனது பெரியப்பா பிருத்தானியா செல்லுமுன் இந்து வாலிபர் சங்கம் அவருக்கு பிரியாவிடை நடத்தியுள்ளனர். பின் யாவரும் சேர்ந்து ஒரு படம் எடுத்துள்ளனர். அப்படத்திலே கரையில் இருவர் சயிக்கிளை பிடித்து கொண்டு நிற்கிறார்கள். ஒரு சமயம் ஊரிலே சயிக்கிள் ஒரு பிரமாதமான வாகனமாக கருதப்பட்டமையால் அவ்வாறு செய்தார்களோ என எண்ணத் தோன்றுகிறது.
எமது நிலைமை இவ்வாறிருக்க இந்தியாவை நோக்குவோம். பிற்காலத்தில் மகாத்மா என போற்றப்பட்ட கரம்சந்த் மோகனதாஸ் காந்தியும் பிருத்தானியா சென்று கற்றவரே. இவ்வாறாக யாராவது வெளிநாடு சென்றால், அவரை அக்காலத்து மக்கள் ஜாதியில் இருந்து விலக்கி விடுவார்களாம். தம்மை தவிர மற்றவர்கள் யாவரும் இழி குலத்தோரே. அவர்களுடன் இருந்து உணவருந்துவது அவர்கள் ஆசாரத்திற்கு ஏற்புடையது அல்ல. இதற்காக காந்தி ஊர் திரும்பியதும் சில பிராயசித்தங்கள் செய்ததாக அவரது சுயசரிதையில் எழுதியிருந்தார்.
Sea Trade in Ancient India - Prof. K A Narasaiah (Tamil) - Amudasurabhi
.
<iframe width="1127" height="634" src="https://www.youtube.com/embed/Qem1s9PAnsw" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>
<iframe width="1127" height="634" src="https://www.youtube.com/embed/Qem1s9PAnsw" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>
<iframe width="1680" height="993" src="https://www.youtube.com/embed/Qem1s9PAnsw" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>
நன்றி Amudasurabhi
என்றுமே வாழ்வு இன்பமாய் மிளிரும் !
மகாதேவ ஐயர் ஜெயராமசர்மா ... மெல்பேண் .. அவுஸ்திரேலியா
அதிகமாய் பேசினால் அகன்றிடும் அர்த்தமே
அதிகமாய் உண்டால் ஆபத்தே நெருங்கிடும்
அறியாமை நிறையின் அகமிருள் ஆகும்
அளவுடன் நின்றால் அனைத்துமே அமைந்திடும்
ஆசையை வளர்த்தால் அவதியே நிறையும்
ஆணவம் மிகுந்தால் அழிவுதான் கிடைக்கும்
அலைந்திடும் மனத்தால் அனைத்துமே தொலையும்
அனைவரும் குருவை நாடினால் விடியும்
தெளிந்த நன்னீராய் இருந்திடல் நலமே
தேர்ந்துமே கருத்தை கேட்டிடல் நலமே
வலிந்துமே நோன்பை நோற்றிடல் நலமே
வாழ்வினில் சுமையைக் குறைப்பது சுகமே
அழிந்து வரும் தமிழர் இசைக்கருவிகள் – பகுதி 38 –நாழிமணி, பாரிமணி, கைமணி, கொத்துமணி – சரவண பிரபு ராமமூர்த்தி
நாழிமணி, பாரிமணி, கைமணி, கொத்துமணி – கஞ்சக்கருவிகள் நாழிமணி: வென்கலத்தால் ஆனது நாழிமணி. ஒரு நாழி நெல் பிடிக்கும் அளவுடையது. கனமாக இருக்கும்.
வீரசைவ மரபைச் சார்ந்த தெலுங்கு பேசும் கண்ட ஜங்கம் என்கிற சமூக மக்கள் இதை இசைப்பார்கள். நாழிமணிக்காரர் ,நாழிக்காரர், சித்தேச பண்டாரம், மணியாட்டிக்காரர், சித்தூசி பண்டாரம் ஆகிய பெயர்களும் இவர்களுக்கு உண்டு.
இச்சமூகத்தினர் திண்டுக்கல், புதுக்கோட்டை, நெல்லை, மதுரை, தூத்துக்குடி ஆகிய மாவட்டங்களில் குறைந்த அளவில் வசிக்கிறார்கள். இவர்கள் சைவ பாடல்கள், நெல் பாடல் ஆகிவற்றைப் பாடி நெல்லை யாசகமாக பெறுவர்.
அறுவடை மாதங்களில் இவர்கள் ஊர்களுக்கு யாசகம் பெற வருவர்(பட்டிக்கு போதல்). வெள்ளையான நீள அங்கியை அணிந்திருப்பார்கள். தலையில் வெள்ளைத் தலைப்பாகை அதில் பித்தளை சூரிய/சந்திர பிறை இருக்கும்.
பிறையின் நடுவில் மயிலிறகு செருகப்பட்டிருக்கும். தோளில் நெல்லை வாங்குவதற்கு பெரிய
பையை வைத்து இருப்பார்கள். இன்னொரு கையில் கம்பு இருக்கும். கையில் வைத்திருக்கும் மணியை ஆட்டிக் கொண்டே வீடு வீடாகப் போவார்கள்.
வீட்டு வாசலில் நின்று மணியை ஆட்டியவாறு பாடத் தொடங்குவார்கள். அந்தப் பாடல் வாழ்த்துவது போலிருக்கும். ‘பொலி பெருக… பட்டி பெருக… களம் பொலிக…’ என்று, எல்லாமே நல்லபடியாக நடக்க வேண்டும்; குடியானவர்களுக்கு நல்ல மகசூல் காண வேண்டும் என அவர்கள் வேண்டுவது கேட்பவர்களுக்கு மன நிறைவு தரும். நெல் கொண்டு வந்தால் நாழி அளவு நெல் பிடிக்கும் மணியைக் கவிழ்த்துப் பிடித்து இரு தடவைகள் நெல்லை வாங்கிக் கொள்வார்கள்.
நெல்லுக்கு பதில் பணமும் பெறுவர். நெல் அல்லது பணம் வாங்கிய வீட்டுச் சுவரில் காவிக்கட்டியினால் அந்த வருடத்தைக் குறிக்கும் அடையாளக் குறியை கிறுக்கி விட்டுப் போவார்கள். இதை காணும் அடுத்து வரும் நாழிமணிக்காரர் திரும்பவும் அவ்வீட்டில் யாசகம் வாங்க மாட்டார்.
எழுத்தும் வாழ்க்கையும் -- அங்கம் 15 இலக்கியத்திற்காக தெருவெங்கும் அலைந்த காலமும் பொற்காலம்தான் ! “ பிச்சை எடுக்குமாம் பெருமாள் , அதை பிடுங்கித்தின்னுமாம் அநுமார் “ முருகபூபதி
இலங்கை முற்போக்கு எழுத்தாளர் சங்கம் 1974 ஆம் ஆண்டு கொழும்பில் அடுத்தடுத்து இரண்டு நாட்கள் தேசிய ஒருமைப்பாட்டு மாநாட்டை நடத்திமுடித்த பின்னர் தீவிரமாக இயங்கியது. அவ்வேளையில் பதவியிலிருந்த கூட்டரசாங்கம் பல முற்போக்கான திட்டங்களையும் நடைமுறைப்படுத்தியதுடன் உள்நாட்டு உற்பத்திகளுக்கும் முக்கியத்துவம் வழங்கியது.
அக்காலத்தை மரவள்ளிக்கிழங்கு காலம் என்றும் எதிரணியினர் எள்ளிநகையாடினர். வடக்கில் மிளகாய், வெங்காயம் பயிர்ச்செய்கையில் விவசாயிகளுடைய பொற்காலம்.
உள்நாட்டில் திரைப்படங்களை ஊக்குவிப்பதற்காக திரைப்படக்கூட்டுத்தாபனம் தோன்றியது. எமது சங்கத்தின் செயலாளர் பிரேம்ஜி ஞானசுந்தரன் அயராத பணியாளர். தன்னை முன்னிலைப்படுத்தாமல் பல ஆக்கபூர்வமான பணிகளுக்கு பின்னின்று உழைத்தவர்.
அத்துடன் மும்மொழியிலும் சரளமாகப் பேசுவார். எந்தப்பெரிய அரசியல் தலைவர்களையும் பெயர் சொல்லி அழைப்பார். அவர் ஶ்ரீமாவை மாத்திரம் பி. எம். என்பார். இடதுசாரித்தலைவர்களை தோழர்
என்றோ, Comrade என்றோ அழைப்பார்.
சங்கம் எழுத்தாளர் கூட்டுறவுப்பதிப்பகத்தை மீண்டும் இயங்கவைக்கப்போவதாகவும் அதன் பணிகளுக்கு ஒரு முழுநேர ஊழியர் தேவை என்று சொன்ன அவர், என்னை அதற்கு எவ்வாறு தெரிவுசெய்தார் என்பது தெரியாது.
வேலை இல்லாமல் நான் சிரமப்படலாகாது என்ற நல்லெண்ணம் மாத்திரம் அவரிடமிருந்ததை அறிந்தேன். சங்கத்தின் தலைமைக்குழு உறுப்பினர் நண்பர் காவலூர் இராஜதுரை அச்சமயத்தில் இலங்கை வானொலியில் பணியாற்றினார்.
அவரும் சிறுகதை எழுத்தாளர்தான். அவரது இல்லம் கொழும்பு கொள்ளுப்பிட்டியில் அமைந்திருந்தது. அதன் முகவரி: 51/9 ஹட்சன் வீதி, கொள்ளுப்பிட்டி. சங்கத்தின் முகவரியாக அதனையே பயன்படுத்தினார்கள்.
அந்த இல்லத்திலும் சங்கத்தின் கூட்டங்கள் அடிக்கடி நடக்கும். காவலூர் இராஜதுரையின் மைத்துனர் இராஜசிங்கம் ஆரம்ப முதலீட்டை வழங்க , திரைப்படக்கூட்டுத்தாபனத்தின் மானிய உதவியுடன் தனது கதையான பொன்மணியை திரைப்படமாக்குவதற்கு நண்பர் தயாரானார்.
சங்கத்தின் கூட்டுறவுப்பதிப்பகம் தோன்றிய கதையை பிரேம்ஜி என்னிடம் விஸ்தாரமாக எடுத்துச்சொன்னார். கேரளா எழுத்தாளர்களும் அத்தகைய அமைப்பினை நடத்தி சிறந்த நூல்களை வெளியிட்டு வெற்றிகரமாக நடத்தி வருகிறார்கள்.
இலங்கைச் செய்திகள்
அமெரிக்க இராஜாங்க செயலாளர் இலங்கை விஜயத்தின் போது...
நிலையான அபிவிருத்தியே அமெரிக்காவின் எதிர்பார்ப்பு
கொரோனா வைரஸ் தீவிரம் மேலும் மூவர் நேற்று மரணம்
சபாநாயகர் கையொப்பம்; 20ஆவது திருத்தம் இன்று முதல் அமுல்
பொத்துவிலில் தனிமைப்படுத்தப்பட்டோருக்கு உலருணவு
வீடுகளில் தனிமைப்படுத்தப்பட்ட குடும்பங்களுக்கு அரசு நிவாரணம்
முஹம்மது நபி மனித குலத்திற்கு செய்த அர்ப்பணிப்புகள் ஏராளம்
மானிட அன்பை கட்டியெழுப்ப தம்மை அர்ப்பணித்த உத்தமர் நபி
இலங்கையின் அபிவிருத்திக்கு உதவுவதற்கு அமெரிக்கா தயார்
20க்கு ஆதரவளித்த 09 எம்.பிக்களும் ஐக்கிய மக்கள் சக்தியிலிருந்து நீக்கம்
அமெரிக்க இராஜாங்க செயலாளர் இலங்கை விஜயத்தின் போது...
Thursday, October 29, 2020 - 6:00am
உலகச் செய்திகள்
பெண்கள் மீது சோதனை; மன்னிப்பு கேட்டது கட்டார்
பொலிஸ் சூட்டில் மற்றொரு கறுப்பின இளைஞன் பலி
தாய்வானுக்கு ஏவுகணை விற்க அமெரிக்கா முடிவு
இஸ்ரேல் துருப்புகள் தாக்குதல்: பலஸ்தீன இளைஞர் உயிரிழப்பு
சிரியாவில் ரஷ்ய வான் தாக்குதலில் பலர் பலி
ஹொங்கொங்கில் மூன்று ஜனநாயக ஆர்வலர் கைது
அமெரிக்காவின் பாலியல் வழிபாட்டு குழு தலைவருக்கு 120 ஆண்டு சிறை
அமெரிக்க ஜனாதிபதி தேர்தல்: இறுதிக் கட்ட பிரசாரம் தீவிரம்
கொவிட்–19: ஐரோப்பாவெங்கும் தினசரி உயிரிழப்பு அதிகரிப்பு
கருணைக்கொலைக்கு நியூசிலாந்தில் ஆதரவு
பெண்கள் மீது சோதனை; மன்னிப்பு கேட்டது கட்டார்
Thursday, October 29, 2020 - 6:00am
விமான நிலையத்தில் கண்டெடுக்கப்பட்ட சிசுவின் தாயைக் கண்டறிய அவுஸ்திரேலியா செல்லவிருந்த கட்டார் ஏர்வேஸ் விமானத்தில் இருந்த பெண் பயணிகளுக்கு கட்டாயப் பரிசோதனை நடத்திய விவகாரத்தில் கட்டார் மன்னிப்புக் கோரியுள்ளது.
பெண் பயணிகளுக்கு கட்டாய மருத்துவப் பரிசோதனை நடத்திய விவகாரத்துக்கு அவுஸ்திரேலிய அரசு தனது கடும் கண்டனத்தைப் பதிவு செய்திருந்ததன் பின்னணியில் கட்டார் மன்னிப்புக் கோரியுள்ளது.
இதன்போது பெண்களின் ஆடையை கழற்றி சோதனை நடத்தப்பட்டுள்ளது. இப்பெண்கள் ஆம்புலன்சுக்கு அழைத்து செல்லப்பட்டு அங்கு அவர்களது உள்ளாடையை நீக்கிய பிறகு மருத்துவ பரிசோதனை மேற்கொள்ளப்பட்டுள்ளது.
இதனால் மன உளைச்சலுக்கு ஆளான பெண்கள், அவுஸ்திரேலிய அரசிடம் மருத்துவ ரீதியான உதவிகளைப் பெற்றதாக அதனை நேரில் பார்த்தவர் ஒருவர் தெரவித்தார்.
ஒக்டோபர் 2ஆம் திகதி கட்டார் விமான நிலையத்தில் அடையாளம் தெரியாத குறைமாதத்தில் பிறந்த குழந்தை ஒன்று கண்டெடுக்கப்பட்டது. அதன் தாயை உடனடியாகக் கண்டுபிடிப்பதற்காக விமான நிலையத்தில் வெளிநாடு செல்லத் தயாராக இருந்த பெண் பயணிகளுக்கு கட்டாய மருத்துவப் பரிசோதனை செய்து யாருக்கேனும் குழந்தை பிரசவித்ததற்கான அடையாளம் இருக்கிறதா என்பதை கண்டறிய முனைந்துள்ளனர்.
இதுபோன்றதொரு பரிசோதனை பாலியல் வன்கொடுமைக்கு இணையானது என்று மனித உரிமை காப்பாளர்களால் கண்டிக்கப்பட்டுள்ளது.
Subscribe to:
Posts (Atom)
